Latinske vers forbudt for børn (Versi latini proibiti per bambini)
i kropssprogets orden (1:1-136) udvalgt, gendigtet og udgivet 1996
Venstre margin: heksametre, pentametre, ïamber, ellevestavelsesvers
lydbog på dansk til latinsk tekst i traditionsbestemt samme versemål
Anbefales: Martials kropssprog, indhold, omfordeling, versemål
Skrevet og læst med betoninger som ictus metricus: ritmo secondo l’accento del verso
⬇ Cerca Ctrl + F (find). Modifica file Audio? è possibile (slow/fast! or minimize/download …⬆️)
(gendigtet af Niels Felskov) Prossimo file n. 604
VULTU, ORE Hovedsætninger ANSIGT, MUND
-------------------------------------------------------------------
Marcus Valerius Martialis: Epigrammer.
5. bog, 2. digt. 1 0:18
1 Matronae puerique virginesque, = file n. 466
2 vobis pagina nostra dedicatur.
3 tu, quem nequitiae procaciores
4 delectant nimium salesque nudi,
5 lascivos lege quattuor libellos:
6 quintus cum domino liber iocatur;
7 quem Germanicus ore non rubenti
8 coram Cecropia legat puella.
11. bog, 91. digt. 2 0:48
1 Aeolidos Canace iacet hoc tumulata sepulchro, = file n. 492
2 ultima cui parvae septima venit hiemps.
3 a scelus, a facinus! properas qui flere, viator,
4 non licet hic vitae de brevitate queri:
5 tristius est leto leti genus: horrida vultus
6 apstulit et tenero sedit in ore lues,
7 ipsaque crudeles ederunt oscula morbi
8 nec data sunt nigris tota labella rogis.
9 si tam praecipiti fuerant ventura volatu,
10 debuerant alia fata venire via.
11 sed mors vocis iter properavit cludere blandae,
12 ne posset duras flectere lingua deas.
5. bog, 34. digt. 3 1:50
1 Hanc tibi, Fronto pater, genetrix Flaccilla, puellam = file n. 467
2 oscula commendo deliciasque meas,
3 parvula ne nigras horrescat Erotion umbras
4 oraque Tartarei prodigiosa canis.
5 inpletura fuit sextae modo frigora brumae,
6 vixisset totidem ni minus illa dies.
7 inter tam veteres ludat lasciva patronos
8 et nomen blaeso garriat ore meum.
9 mollia non rigidus caespes tegat ossa nec illi,
10 terra, gravis fueris: non fuit illa tibi.
9. bog, 74. digt. 4 2:45
1 Effigiem tantum pueri pictura Camoni = file n. 484
2 servat, et infantis parva figura manet.
3 florentes nulla signavit imagine vultus,
4 dum timet ora pius muta videre pater.
1. bog, 83. digt. 5 3:06
1 Os et labra tibi lingit, Manneia, catellus: = file n. 454
2 non miror, merdas si libet esse cani.
13. bog, 18. digt. Porri sectivi 6 3:20
1 Fila Tarentini graviter redolentia porri = file n. 497
2 edisti quotiens, oscula clusa dato.
2. bog, 12. digt. 7 3:35
1 Esse quid hoc dicam quod olent tua basia murram = file n. 456
2 quodque tibi est numquam non alienus odor?
3 hoc mihi suspectum est, quod oles bene, Postume, semper:
4 Postume, non bene olet qui bene semper olet.
2. bog, 23. digt. 8 3:55
1 Non dicam, licet usque me rogetis, = file n. 456
2 qui sit Postumus in meo libello,
3 non dicam: quid enim mihi necesse est
4 has offendere basiationes
5 quae se tam bene vindicare possunt?
10-----------------------------------------------------------------LABRO Hovedsætninger LÆBE
-------------------------------------------------------------------
Marcus Valerius Martialis: Epigrammer.
2. bog, 10. digt. 9 4:03
1 Basia dimidio quod das mihi, Postume, labro, = file n. 456
2 laudo: licet demas hinc quoque dimidium.
3 vis dare maius adhuc et inenarrabile munus?
4 hoc tibi habe totum, Postume, dimidium.
2. bog, 22. digt. 10 4:34
1 Quid mihi vobiscum est, o Phoebe novemque sorores? = file n. 456
2 ecce nocet vati Musa iocosa suo.
3 dimidio nobis dare Postumus ante solebat
4 basia, nunc labro coepit utroque dare.
11. bog, 98. digt. 11 4:57
1 Effugere non est, Flacce, basiatores. = file n. 449
2 instant, morantur, persecuntur, occurrunt
3 et hinc et illinc, usquequaque, quacumque.
4 non ulcus acre pusulaeve lucentes,
5 nec triste mentum sordidique lichenes,
6 nec labra pingui delibuta cerato,
7 nec congelati gutta proderit nasi.
8 et aestuantem basiant et algentem,
9 et nuptiale basium reservantem.
10 non te cucullis adseret caput tectum,
11 lectica nec te tuta pelle veloque,
12 nec vindicabit sella saepius clusa:
13 rimas per omnis basiator intrabit.
14 non consulatus ipse, non tribunatus non seni fasces nec lictoris virga. ret 2023
15 senive fasces nec superba clamosi på seks betjente (én har pisk og fem økser)
16 lictoris abiget virga basiatorem:
17 sedeas in alto tu licet tribunali
18 et e curuli iura gentibus reddas,
19 ascendet illa basiator atque illa.
20 febricitantem basiabit et flentem,
21 dabit oscitanti basium natantique,
22 dabit cacanti. remedium mali solum est,
23 facias amicum basiare quem nolis.
7. bog, 95. digt. 12 6:23
1 Bruma est et riget horridus December, = file n. 476
2 audes tu tamen osculo nivali
3 omnes obvius hinc et hinc tenere
4 et totam, Line, basiare Romam.
5 quid posses graviusque saeviusque
6 percussus facere atque verberatus?
7 hoc me frigore basiet nec uxor
8 blandis filia nec rudis labellis,
9 sed tu dulcior elegantiorque,
10 cuius livida naribus caninis
11 dependet glacies rigetque barba,
12 qualem forficibus metit supinis
13 tonsor Cinyphio Cilix marito.
14 centum occurrere malo cunnilingis
15 et Gallum timeo minus recentem.
16 quare si tibi sensus est pudorque,
17 hibernas, Line, basiationes
18 in mensem rogo differas Aprilem.
10. bog, 22. digt. 13 7:28
1 Cur spleniato saepe prodeam mento = file n. 448
2 albave pictus sana labra cerussa,
3 Philaeni, quaeris? basiare te nolo.
12-----------------------------------------------------------------LINGUA Hovedsætninger TUNGE
-------------------------------------------------------------------
Marcus Valerius Martialis: Epigrammer.
2. bog, 33. digt. 14 7:43
1 Cur non basio te, Philaeni, calva es. = file n. 457
2 cur non basio te, Philaeni, rufa es.
3 cur non basio te, Philaeni, lusca es.
4 haec qui basiat, o Philaeni, fellat.
12. bog, 55. digt. 15 8:00
1 Gratis qui dare vos iubet, puellae, = file n. 495
2 insulsissimus inprobissimusque est.
3 gratis ne date, basiate gratis.
4 hoc Aegle negat, hoc avara vendit
5 (sed vendat: bene basiare quantum est!)
6 hoc vendit quoque nec levi rapina:
7 aut libram petit illa Cosmiani
8 aut binos quater a nova moneta,
9 ne sint basia muta, ne maligna,
10 ne clusis aditum neget labellis.
11 humane tamen hoc facit: recusat
12 gratis quae dare basium, sed unum,
13 gratis lingere non recusat Aegle.
6. bog, 66. digt. 16 8:45
1 Famae non nimium bonae puellam, = file n. 471
2 quales in media sedent Subura,
3 vendebat modo praeco Gellianus.
4 parvo cum pretio diu liceret,
5 dum puram cupit adprobare cunctis,
6 adtraxit prope se manu negantem
7 et bis terque quaterque basiavit.
8 quid profecerit osculo requiris?
9 sescentos modo qui dabat negavit.
11. bog, 23. digt. 17 9:20
1 Nubere Sila mihi nulla non lege parata est; = file n. 490
2 sed Silam nulla ducere lege volo.
3 cum tamen instaret, "Deciens mihi dotis in auro
4 sponsa dabis" dixi; "quid minus esse potest?
5 nec futuam quamvis prima te nocte maritus,
6 communis tecum nec mihi lectus erit;
7 complectarque meam, nec tu prohibebis, amicam,
8 ancillam mittes et mihi iussa tuam.
9 te spectante dabit nobis lasciva minister
10 basia, sive meus sive erit ille tuus.
11 ad cenam venies, sed sic divisa recumbes
12 ut non tangantur pallia nostra tuis.
13 oscula rara dabis nobis et non dabis ultro,
14 nec quasi nupta dabis sed quasi mater anus.
15 si potes ista pati, si nil perferre recusas,
16 invenies qui te ducere, Sila, velit."
12. bog, 93. digt. 18 10:25
1 Qua moechum ratione basiaret = file n. 496
2 coram coniuge repperit Labulla.
3 parvum basiat usque morionem;
4 hunc multis rapit osculis madentem
5 moechus protinus et suis repletum
6 ridenti dominae statim remittit.
7 quanto morio maior est maritus!
2. bog, 82. digt. 19 10:51
1 Abscisa servum quid figis, Pontice, lingua? = file n. 458
2 nescis tu populum, quod tacet ille, loqui?
14-----------------------------------------------------------------DENTE Hovedsætninger TAND
-------------------------------------------------------------------
Marcus Valerius Martialis: Epigrammer.
11. bog, 102. digt. 20 11:03
1 Non est mentitus qui te mihi dixit habere = file n. 492
2 formosam carnem, Lydia, non faciem.
3 est ita, si taceas et si tam muta recumbas
4 quam silet in cera vultus et in tabula.
5 sed quotiens loqueris, carnem quoque, Lydia, perdis
6 et sua plus nulli quam tibi lingua nocet.
7 audiat aedilis ne te videatque caveto:
8 portentum est, quotiens coepit imago loqui.
3. bog, 80. digt. 21 11:47
1 De nullo quereris, nulli maledicis, Apici: = file n. 461
2 rumor ait linguae te tamen esse malae.
14. bog, 68. digt. Copta Rhodiaca 22 11:58
1 Peccantis famuli pugno ne percute dentes: = file n. 498
2 clara Rhodos coptam quam tibi misit edat.
1. bog, 19. digt. 23 12:14
1 Si memini, fuerant tibi quattuor, Aelia, dentes: = file n. 452
2 expulit una duos tussis et una duos.
3 iam secura potes totis tussire diebus:
4 nil istic quod agat tertia tussis habet.
8. bog, 57. digt. 24 12:34
1 Tres habuit dentes, pariter quos exspuit omnes, = file n. 479
2 ad tumulum Picens dum sedet ipse suum;
3 collegitque sinu fragmenta novissima laxi
4 oris et adgesta contumulavit humo.
5 ossa licet quondam defuncti non legat heres:
6 hoc sibi iam Picens praestitit officium.
2. bog, 41. digt. 25 13:10
1 "Ride si sapis, o puella, ride" = file n. 457
2 Paelignus, puto, dixerat, poeta.
3 sed non dixerat omnibus puellis.
4 verum ut dixerit omnibus puellis,
5 non dixit tibi: tu puella non es,
6 et tres sunt tibi, Maximina, dentes,
7 sed plane piceique buxeique.
8 quare si speculo mihique credis,
9 debes non aliter timere risum,
10 quam ventum Spanius manumque Priscus,
11 quam cretata timet Fabulla nimbum,
12 cerussata timet Sabella solem.
13 vultus indue tu magis severos
14 quam coniunx Priami nurusque maior.
15 mimos ridiculi Philistionis
16 et convivia nequiora vita,
17 et quidquid lepida procacitate
18 laxat perspicuo labella risu.
19 te maestae decet adsidere matri
20 lugentive virum piumve fratrem,
21 et tantum tragicis vacare Musis.
22 at tu iudicium secuta nostrum
23 plora, si sapis, o puella, plora.
14. bog, 22. digt. Dentiscalpium 26 14:28
1 Lentiscum melius: sed si tibi frondea cuspis = file n. 498
2 defuerit, dentes pinna levare potest.
16-----------------------------------------------------------------FAUCE, AURE Hovedsætninger HALS, ØRE
-------------------------------------------------------------------
Marcus Valerius Martialis: Epigrammer.
14. bog, 56. digt. Dentifricium 27 14:42
1 Quid mecum est tibi? me puella sumat: = file n. 498
2 emptos non soleo polire dentes.
5. bog, 43. digt. 28 14:55
1 Thais habet nigros, niveos Laecania dentes. = file n. 467
2 quae ratio est? emptos haec habet, illa suos.
1. bog, 72. digt. 29 15:07
1 Nostris versibus esse te poetam, = file n. 454
2 Fidentine, putas cupisque credi?
3 sic dentata sibi videtur Aegle
4 emptis ossibus Indicoque cornu;
5 sic quae nigrior est cadente moro,
6 cerussata sibi placet Lycoris.
7 hac et tu ratione qua poeta es,
8 calvus cum fueris, eris comatus.
14. bog, 54. digt. Crepitacillum 30 15:32
1 Si quis plorator collo tibi vernula pendet, = file n. 498
2 haec quatiat tenera garrula sistra manu.
11. bog, 86. digt. 31 15:44
1 Leniat ut fauces medicus, quas aspera vexat = file n. 492
2 adsidue tussis, Parthenopaee, tibi,
3 mella dari nucleosque iubet dulcesque placentas
4 et quidquid pueros non sinit esse truces.
5 at tu non cessas totis tussire diebus.
6 non est haec tussis, Parthenopaee, gula est.
6. bog, 41. digt. 32 16:19
1 Qui recitat lana fauces et colla revinctus, = file n. 470
2 hic se posse loqui, posse tacere negat.
4. bog, 41. digt. 33 16:29
1 Quid recitaturus circumdas vellera collo? = file n. 463
2 conveniunt nostris auribus ista magis.
14. bog, 142. digt. Focale 34 16:40
1 Si recitaturus dedero tibi forte libellum, = file n. 499
2 hoc focale tuas adserat auriculas.
3. bog, 44. digt. 35 16:52
1 Occurrit tibi nemo quod libenter, = file n. 460
2 quod, quacumque venis, fuga est et ingens
3 circa te, Ligurine, solitudo,
4 quid sit, scire cupis? nimis poeta es.
5 hoc valde vitium periculosum est.
6 non tigris catulis citata raptis,
7 non dipsas medio perusta sole,
8 nec sic scorpios inprobus timetur.
9 nam tantos, rogo, quis ferat labores?
10 et stanti legis et legis sedenti,
11 currenti legis et legis cacanti.
12 in thermas fugio: sonas ad aurem.
13 piscinam peto: non licet natare.
14 ad cenam propero: tenes euntem.
15 ad cenam venio: fugas edentem.
16 lassus dormio: suscitas iacentem.
17 vis, quantum facias mali, videre?
18 vir iustus probus innocens timeris.
18-----------------------------------------------------------------OCULO Hovedsætninger ØJE
-------------------------------------------------------------------
Marcus Valerius Martialis: Epigrammer.
3. bog, 28. digt. 36 17:55
1 Auriculam Mario graviter miraris olere. = file n. 459
2 tu facis hoc: garris, Nestor, in auriculam.
1. bog, 89. digt. 37 18:09
1 Garris in aurem semper omnibus, Cinna, = file n. 444
2 garrire et illud teste quod licet turba.
3 rides in aurem, quereris, arguis, ploras,
4 cantas in aurem, iudicas, taces, clamas,
5 adeoque penitus sedit hic tibi morbus,
6 ut saepe in aurem, Cinna, Caesarem laudes.
11. bog, 24. digt. 38 18:35
1 Dum te prosequor et domum reduco, = file n. 490
2 aurem dum tibi praesto garrienti,
3 et quidquid loqueris facisque laudo,
4 quot versus poterant, Labulle, nasci!
5 hoc damnum tibi non videtur esse,
6 si quod Roma legit, requirit hospes,
7 non deridet eques, tenet senator,
8 laudat causidicus, poeta carpit,
9 propter te perit? hoc, Labulle, verum est?
10 hoc quisquam ferat? ut tibi tuorum
11 sit maior numerus togatulorum,
12 librorum mihi sit minor meorum?
13 triginta prope iam diebus una est
14 nobis pagina vix peracta. sic fit
15 cum cenare domi poeta non vult.
12. bog, 23. digt. 39 19:27
1 Dentibus atque comis (nec te pudet) uteris emptis. = file n. 493
2 quid facies oculo, Laelia? non emitur.
3. bog, 8. digt. 40 19:41
1 "Thaida Quintus amat." "Quam Thaida?" "Thaida luscam." = file n. 459
2 unum oculum Thais non habet, ille duos.
4. bog, 65. digt. 41 19:54
1 Oculo Philaenis semper altero plorat. = file n. 446
2 quo fiat istud quaeritis modo? lusca est.
6. bog, 78. digt. 42 20:05
1 Potor nobilis, Aule, lumine uno = file n. 472
2 luscus Phryx erat alteroque lippus.
3 huic Heras medicus "Bibas caveto:
4 vinum si biberis, nihil videbis."
5 ridens Phryx oculo "Valebis" inquit.
6 misceri sibi protinus deunces
7 sed crebros iubet. exitum requiris?
8 vinum Phryx, oculus bibit venenum.
9. bog, 25. digt. 43 20:36
1 Dantem vina tuum quotiens aspeximus Hyllum, = file n. 481
2 lumine nos, Afer, turbidiore notas.
3 quod, rogo, quod scelus est mollem spectare ministrum?
4 aspicimus solem sidera templa deos.
5 avertam vultus, tamquam mihi pocula Gorgon
6 porrigat atque oculos oraque nostra petat?
7 trux erat Alcides, et Hylan spectare licebat;
8 ludere Mercurio cum Ganymede licet.
9 si non vis teneros spectet conviva ministros,
10 Phineas invites, Afer, et Oedipodas.
20-----------------------------------------------------------------NASO Hovedsætninger NÆSE
-------------------------------------------------------------------
Marcus Valerius Martialis: Epigrammer.
8. bog, 59. digt. 44 21:27
1 Aspicis hunc uno contentum lumine, cuius = file n. 479
2 lippa sub adtrita fronte lacuna patet?
3 ne contemne caput, nihil est furacius illo;
4 non fuit Autolyci tam piperata manus.
5 hunc tu convivam cautus servare memento:
6 tunc furit atque oculo luscus utroque videt.
7 pocula solliciti perdunt ligulasque ministri
8 et latet in tepido plurima mappa sinu;
9 lapsa nec a cubito subducere pallia nescit
10 et tectus laenis saepe duabus abit;
11 nec dormitantem vernam fraudare lucerna
12 erubuit fallax, ardeat illa licet.
13 si nihil invasit, puerum tunc arte dolosa
14 circuit et soleas subripit ipse suas.
4. bog, 30. digt. 45 22:30
1 Baiano procul a lacu, monemus, = file n. 463
2 piscator, fuge, ne nocens recedas.
3 sacris piscibus hae natantur undae,
4 qui norunt dominum manumque lambunt
5 illam, qua nihil est in orbe maius.
6 quid quod nomen habent et ad magistri
7 vocem quisque sui venit citatus?
8 hoc quondam Libys impius profundo,
9 dum praedam calamo tremente ducit,
10 raptis luminibus repente caecus
11 captum non potuit videre piscem,
12 et nunc sacrilegos perosus hamos
13 Baianos sedet ad lacus rogator.
14 at tu, dum potes, innocens recede
15 iactis simplicibus cibis in undas,
16 et pisces venerare delicatos.
14. bog, 59. digt. Opobalsama 46 23:24
1 Balsama me capiunt, haec sunt unguenta virorum: = file n. 498
2 delicias Cosmi vos redolete, nurus.
12. bog, 37. digt. 47 23:40
1 Nasutus nimium cupis videri. = file n. 494
2 nasutum volo, nolo polyposum.
7. bog, 37. digt. 48 23:48
1 Nosti mortiferum quaestoris, Castrice, signum? = file n. 474
2 est operae pretium discere theta novum:
3 exprimeret quotiens rorantem frigore nasum,
4 letalem iuguli iusserat esse notam.
5 turpis ab inviso pendebat stiria naso,
6 cum flaret media fauce December atrox:
7 collegae tenuere manus: quid plura requiris?
8 emungi misero, Castrice, non licuit.
2. bog, 83. digt. 49 24:26
1 Foedasti miserum, marite, moechum, = file n. 458
2 et se, qui fuerant prius, requirunt
3 trunci naribus auribusque vultus.
4 credis te satis esse vindicatum?
5 erras: iste potest et irrumare.
12. bog, 88. digt. 50 24:45
1 Tongilianus habet nasum, scio, non nego. sed iam = file n. 496
2 nil praeter nasum Tongilianus habet.
22-----------------------------------------------------------------GENA, COMA Hovedsætninger KIND, FRISURE
-------------------------------------------------------------------
Marcus Valerius Martialis: Epigrammer.
10. bog, 42. digt. 51 25:00
1 Tam dubia est lanugo tibi, tam mollis ut illam = file n. 486
2 halitus et soles et levis aura terat.
3 celantur simili ventura Cydonea lana,
4 pollice virgineo quae spoliata nitent.
5 fortius inpressi quotiens tibi basia quinque,
6 barbatus labris, Dindyme, fio tuis.
6. bog, 52. digt. 52 25:30
1 Hoc iacet in tumulo raptus puerilibus annis = file n. 471
2 Pantagathus, domini cura dolorque sui,
3 vix tangente vagos ferro resecare capillos
4 doctus et hirsutas excoluisse genas.
5 sis licet, ut debes, tellus, placata levisque,
6 artificis levior non potes esse manu.
1. bog, 31. digt. 53 26:04
1 Hos tibi, Phoebe, vovet totos a vertice crines = file n. 452
2 Encolpos, domini centurionis amor,
3 grata Pudens meriti tulerit cum praemia pili.
4 quam primum longas, Phoebe, recide comas,
5 dum nulla teneri sordent lanugine vultus
6 dumque decent fusae lactea colla iubae;
7 utque tuis longum dominusque puerque fruantur
8 muneribus, tonsum fac cito, sero virum.
4. bog, 7. digt. 54 26:45
1 Cur, here quod dederas, hodie, puer Hylle, negasti, = file n. 462
2 durus tam subito qui modo mitis eras?
3 sed iam causaris barbamque annosque pilosque.
4 o nox quam longa es quae facis una senem!
5 quid nos derides? here qui puer, Hylle, fuisti,
6 dic nobis, hodie qua ratione vir es?
2. bog, 36. digt. 55 27:16
1 Flectere te nolim sed nec turbare capillos; = file n. 457
2 splendida sit nolo, sordida nolo cutis;
3 nec tibi mitrarum nec sit tibi barba reorum:
4 nolo virum nimium, Pannyche, nolo parum.
5 nunc sunt crura pilis et sunt tibi pectora saetis
6 horrida, sed mens est, Pannyche, vulsa tibi.
12. bog, 84. digt. 56 27:47
1 Nolueram, Polytime, tuos violare capillos, = file n. 496
2 sed iuvat hoc precibus me tribuisse tuis.
3 talis eras, modo tonse Pelops, positisque nitebas
4 crinibus ut totum sponsa videret ebur.
2. bog, 66. digt. 57 28:07
1 Unus de toto peccaverat orbe comarum = file n. 458
2 anulus, incerta non bene fixus acu.
3 hoc facinus Lalage speculo, quo viderat, ulta est,
4 et cecidit saevis icta Plecusa comis.
5 desine iam, Lalage, tristes ornare capillos,
6 tangat et insanum nulla puella caput.
7 hoc salamandra notet vel saeva novacula nudet,
8 ut digna speculo fiat imago tua.
14. bog, 36. digt. Ferramenta tonsoria 58 28:44
1 Tondendis haec arma tibi sunt apta capillis; = file n. 498
2 unguibus hic longis utilis, illa genis.
26-----------------------------------------------------------------BARBA Hovedsætninger SKÆG
-------------------------------------------------------------------
Marcus Valerius Martialis: Epigrammer.
7. bog, 83. digt. 59 29:00
1 Eutrapelus tonsor dum circuit ora Luperci = file n. 476
2 expingitque genas, altera barba subit.
8. bog, 52. digt. 60 29:12
1 Tonsorem puerum sed arte talem = file n. 479
2 qualis nec Thalamus fuit Neronis,
3 Drusorum cui contigere barbae,
4 aequandas semel ad genas rogatus
5 Rufo, Caecidiane, commodavi.
6 dum iussus repetit pilos eosdem,
7 censura speculi manum regente,
8 expingitque cutem facitque longam
9 detonsis epaphaeresin capillis,
10 barbatus mihi tonsor est reversus.
1. bog, 24. digt. 61 29:45
1 Aspicis incomptis illum, Deciane, capillis, = file n. 452
2 cuius et ipse times triste supercilium,
3 qui loquitur Curios adsertoresque Camillos?
4 nolito fronti credere: nupsit heri.
4. bog, 53. digt. 62 30:08
1 Hunc, quem saepe vides intra penetralia nostrae = file n. 464
2 Pallados et templi limina, Cosme, novi
3 cum baculo peraque senem, cui cana putrisque
4 stat coma et in pectus sordida barba cadit,
5 cerea quem nudi tegit uxor abolla grabati,
6 cui dat latratos obvia turba cibos,
7 esse putas Cynicum deceptus imagine ficta.
8 non est hic Cynicus, Cosme: quid ergo? canis.
14. bog, 24. digt. Acus aurea 63 30:50
1 Splendida ne madidi violent bombycina crines, = file n. 498
2 figat acus tortas sustineatque comas.
14. bog, 50. digt. Galericulum 64 31:04
1 Ne lutet inmundum nitidos ceroma capillos, = file n. 498
2 hac poteris madidas condere pelle comas.
3. bog, 43. digt. 65 31:16
1 Mentiris iuvenem tinctis, Laetine, capillis, = file n. 460
2 tam subito corvus, qui modo cycnus eras.
3 non omnes fallis; scit te Proserpina canum:
4 personam capiti detrahet illa tuo.
6. bog, 57. digt. 66 31:38
1 Mentiris fictos unguento, Phoebe, capillos = file n. 471
2 et tegitur pictis sordida calva comis.
3 tonsorem capiti non est adhibere necesse:
4 radere te melius spongea, Phoebe, potest.
14. bog, 146. digt. Cervical 67 31:58
1 Tingue caput Cosmi folio, cervical olebit: = file n. 499
2 perdidit unguentum cum coma, pluma tenet.
4. bog, 36. digt. 68 32:14
1 Cana est barba tibi, nigra est coma: tinguere barbam = file n. 463
2 non potes (haec causa est) et potes, Ole, comam.
28-----------------------------------------------------------------CAPILLO Hovedsætninger HÅR
-------------------------------------------------------------------
Marcus Valerius Martialis: Epigrammer.
12. bog, 89. digt. 69 32:24
1 Quod lana caput alligas, Charine, = file n. 496
2 non aures tibi sed dolent capilli.
5. bog, 49. digt. 70 32:35
1 Vidissem modo forte cum sedentem = file n. 467
2 solum te, Labiene, tres putavi.
3 calvae me numerus tuae fefellit.
4 sunt illinc tibi, sunt et hinc capilli
5 quales vel puerum decere possunt:
6 nudumst in medio caput nec ullus
7 in longa pilus area notatur.
8 hic error tibi profuit Decembri,
9 tum cum prandia misit Imperator:
10 cum panariolis tribus redisti.
11 talem Geryonem fuisse credo.
12 vites censeo porticum Philippi:
13 si te viderit Hercules, peristi.
10. bog, 83. digt. 71 33:20
1 Raros colligis hinc et hinc capillos = file n. 488
2 et latum nitidae, Marine, calvae
3 campum temporibus tegis comatis;
4 sed moti redeunt iubente vento
5 reddunturque sibi caputque nudum
6 cirris grandibus hinc et inde cingunt.
7 inter Spendophorum Telesphorumque
8 Cydae stare putabis Hermerotem.
9 vis tu simplicius senem fateri,
10 ut tandem videaris unus esse?
11 calvo turpius est nihil comato.
12. bog, 7. digt. 72 33:58
1 Toto vertice quot gerit capillos = file n. 493
2 annos si tot habet Ligeia, trima est.
14. bog, 25. digt. Pectines 73 34:08
1 Quid faciet nullos hic inventura capillos = file n. 498
2 multifido buxus quae tibi dente datur?
6. bog, 12. digt. 74 34:22
1 Iurat capillos esse, quos emit, suos = file n. 446
2 Fabulla: numquid ergo, Paule, peierat?
5. bog, 68. digt. 75 34:28
1 Arctoa de gente comam tibi, Lesbia, misi, = file n. 468
2 ut scires quanto sit tua flava magis.
14. bog, 26. digt. Crines 76 34:40
1 Chattica Teutonicos accendit spuma capillos: = file n. 498
2 captivis poteris cultior esse comis.
14. bog, 27. digt. Sapo 77 34:52
1 Si mutare paras longaevos cana capillos = file n. 498
2 accipe Mattiacas (quo tibi calva?) pilas.
12. bog, 45. digt. 78 35:05
1 Haedina tibi pelle contegenti = file n. 494
2 nudae tempora verticemque calvae
3 festive tibi, Phoebe, dixit ille
4 qui dixit caput esse calceatum.
30-----------------------------------------------------------------MANU Ledsætninger HÅND
-------------------------------------------------------------------
Marcus Valerius Martialis: Epigrammer.
2. bog, 21. digt. 79 35:20
1 Basia das aliis, aliis das, Postume, dextram. = file n. 456
2 dicis "Utrum mavis? elige." malo manum.
5. bog, 9. digt. 80 35:33
1 Languebam: sed tu comitatus protinus ad me = file n. 466
2 venisti centum, Symmache, discipulis.
3 centum me tetigere manus Aquilone gelatae:
4 non habui febrem, Symmache, nunc habeo.
14. bog, 111. digt. Crystallina 81 35:53
1 Frangere dum metuis, franges crystallina: peccant = file n. 498
2 securae nimium sollicitaeque manus.
8. bog, 40. digt. 82 36:05
1 Non horti neque palmitis beati = file n. 478
2 sed rari nemoris, Priape, custos,
3 ex quo natus es et potes renasci,
4 furaces, moneo, manus repellas
5 et silvam domini focis reserves:
6 si defecerit haec, et ipse lignum es.
14. bog, 208. digt. Notarius 83 36:31
1 Currant verba licet, manus est velocior illis: = file n. 499
2 nondum lingua suum, dextra peregit opus.
7. bog, 11. digt. 84 36:44
1 Cogis me calamo manuque nostra = file n. 473
2 emendare meos, Pudens, libellos.
3 o quam me nimium probas amasque
4 qui vis archetypas habere nugas!
11. bog, 59. digt. 85 37:01
1 Senos Charinus omnibus digitis gerit = file n. 449
2 nec nocte ponit anulos
3 nec cum lavatur. causa quae sit quaeritis?
4 dactyliothecam non habet.
5. bog, 11. digt. 86 37:14
1 Sardonychas, zmaragdos, adamantas, iaspidas uno = file n. 466
2 versat in articulo Stella, Severe, meus.
3 multas in digitis, plures in carmine gemmas
4 invenies: inde est haec, puto, culta manus.
11. bog, 37. digt. 87 37:34
1 Zoile, quid tota gemmam praecingere libra = file n. 490
2 te iuvat et miserum perdere sardonycha?
3 anulus iste tuis fuerat modo cruribus aptus:
4 non eadem digitis pondera conveniunt.
14. bog, 167. digt. Plectrum 88 37:54
1 Fervida ne trito tibi pollice pusula surgat, = file n. 499
2 exornent docilem candida plectra lyram.
5. bog, 12. digt. 89 38:08
1 Quod nutantia fronte perticata = file n. 466
2 gestat pondera Masclion superbus,
3 aut grandis Ninus omnibus lacertis
4 septem quod pueros levat vel octo,
5 res non difficilis mihi videtur,
6 uno cum digito vel hoc vel illo
7 portet Stella meus decem puellas.
32-----------------------------------------------------------------PEDE, CRURE Ledsætninger FOD, BEN
-------------------------------------------------------------------
Marcus Valerius Martialis: Epigrammer.
4. bog, 27. digt. 90 38:36
1 Saepe meos laudare soles, Auguste, libellos. = file n. 463
2 invidus ecce negat: num minus ergo soles?
3 quid quod honorato non sola voce dedisti,
4 non alius poterat quae dare dona mihi?
5 ecce iterum nigros conrodit lividus ungues.
6 da, Caesar, tanto tu magis, ut doleat.
14. bog, 49. digt. Halteres 91 39:08
1 Quid pereunt stulto fortes haltere lacerti? = file n. 498
2 exercet melius vinea fossa viros.
2. bog, 35. digt. 92 39:20
1 Cum sint crura tibi simulent quae cornua lunae, = file n. 457
2 in rhytio poteras, Phoebe, lavare pedes.
7. bog, 33. digt. 93 39:32
1 Sordidior caeno cum sit toga, calceus autem = file n. 474
2 candidior prima sit tibi, Cinna, nive:
3 deiecto quid, inepte, pedes perfundis amictu?
4 collige, Cinna, togam; calceus ecce perit.
12. bog, 87. digt. 94 39:51
1 Bis Cotta soleas perdidisse se questus, = file n. 449
2 dum neglegentem ducit ad pedes vernam,
3 qui solus inopi praestat et facit turbam,
4 excogitavit homo sagax et astutus
5 ne facere posset tale saepius damnum:
6 excalceatus ire coepit ad cenam.
14. bog, 65. digt. Soleae lanatae 95 40:14
1 Defuerit si forte puer soleasque libebit = file n. 498
2 sumere, pro puero pes erit ipse sibi.
7. bog, 39. digt. 96 40:28
1 Discursus varios vagumque mane = file n. 474
2 et fastus et have potentiorum
3 cum perferre patique iam negaret,
4 coepit fingere Caelius podagram.
5 quam dum vult nimis adprobare veram
6 et sanas linit obligatque plantas
7 inceditque gradu laborioso,
8 (quantum cura potest et ars doloris!)
9 desit fingere Caelius podagram.
10. bog, 100. digt. 97 41:00
1 Quid, stulte, nostris versibus tuos misces? = file n. 448
2 cum litigante quid tibi, miser, libro?
3 quid congregare cum leonibus vulpes
4 aquilisque similes facere noctuas quaeris?
5 habeas licebit alterum pedem Ladae,
6 inepte, frustra crure ligneo curris.
11. bog, 71. digt. 98 41:22
1 Hystericam vetulo se dixerat esse marito = file n. 492
2 et queritur futui Leda necesse sibi;
3 sed flens atque gemens tanti negat esse salutem
4 seque refert potius proposuisse mori.
5 vir rogat ut vivat, virides nec deserat annos,
6 et fieri quod iam non facit ipse sinit.
7 protinus accedunt medici medicaeque recedunt,
8 tollunturque pedes. o medicina gravis!
34-----------------------------------------------------------------VENTRE, NATE Bisætninger MAVE, BAGDEL
-------------------------------------------------------------------
Marcus Valerius Martialis: Epigrammer.
3. bog, 42. digt. 99 42:02
1 Lomento rugas uteri quod condere temptas, = file n. 460
2 Polla, tibi ventrem, non mihi labra linis.
3 simpliciter pateat vitium fortasse pusillum:
4 quod tegitur, maius creditur esse malum.
1. bog, 20. digt. 100 42:29
1 Dic mihi, quis furor est? turba spectante vocata = file n. 452
2 solus boletos, Caeciliane, voras.
3 quid dignum tanto tibi ventre gulaque precabor?
4 boletum qualem Claudius edit, edas.
1. bog, 28. digt. 101 42:49
1 Hesterno fetere mero qui credit Acerram, = file n. 452
2 fallitur. In lucem semper Acerra bibit.
1. bog, 87. digt. 102 43:02
1 Ne gravis hesterno fragres, Fescennia, vino, = file n. 454
2 pastillos Cosmi luxuriosa voras.
3 ista linunt dentes ientacula, sed nihil opstant,
4 extremo ructus cum redit a barathro.
5 quid quod olet gravius mixtum diapasmate virus
6 atque duplex animae longius exit odor?
7 notas ergo nimis fraudes deprensaque furta
8 iam tollas et sis ebria simpliciter.
4. bog, 87. digt. 103 43:42
1 Infantem secum semper tua Bassa, Fabulle, = file n. 465
2 conlocat et lusus deliciasque vocat,
3 et, quo mireris magis, infantaria non est.
4 ergo quid in causa est? pedere Bassa solet.
12. bog, 40. digt. 104 44:03
1 Mentiris, credo: recitas mala carmina, laudo: = file n. 494
2 cantas, canto: bibis, Pontiliane, bibo:
3 pedis, dissimulo: gemma vis ludere, vincor:
4 res una est sine me quam facis, et taceo.
5 nil tamen omnino praestas mihi. "Mortuus" inquis
6 "accipiam bene te." nil volo: sed morere.
12. bog, 77. digt. 105 44:33
1 Multis dum precibus Iovem salutat = file n. 496
2 stans summos resupinus usque in ungues
3 Aethon in Capitolio, pepedit.
4 riserunt homines, sed ipse divum
5 offensus genitor trinoctiali
6 adfecit domicenio clientem.
7 post hoc flagitium misellus Aethon,
8 cum vult in Capitolium venire,
9 sellas ante petit Paterclianas
10 et pedit deciesque viciesque.
11 sed quamvis sibi caverit crepando,
12 compressis natibus Iovem salutat.
1. bog, 37. digt. 106 45:14
1 Ventris onus misero, nec te pudet, excipis auro, = file n. 453
2 Basse, bibis vitro. carius ergo cacas.
13. bog, 29. digt. Vas Damascenorum 107 45:25
1 Pruna peregrinae carie rugosa senectae = file n. 497
2 sume: solent duri solvere ventris onus.
36-----------------------------------------------------------------PECTORE, MAMMA Bisætninger BRYST
-------------------------------------------------------------------
Marcus Valerius Martialis: Epigrammer.
3. bog, 89. digt. 108 45:40
1 Utere lactucis et mollibus utere malvis: = file n. 461
2 nam faciem durum, Phoebe, cacantis habes.
3. bog, 78. digt. 109 45:53
1 Minxisti currente semel, Pauline, carina. = file n. 461
2 meiere vis iterum? iam Palinurus eris.
11. bog, 99. digt. 110 46:07
1 De cathedra quotiens surgis (iam saepe notavi), = file n. 492
2 pedicant miserae, Lesbia, te tunicae.
3 quas cum conata es dextra, conata sinistra
4 vellere, cum lacrimis eximis et gemitu:
5 sic constringuntur magni Symplegade culi
6 et nimias intrant Cyaneasque natis.
7 emendare cupis vitium deforme? docebo:
8 Lesbia, nec surgas censeo nec sedeas.
10. bog, 80. digt. 111 46:45
1 Plorat Eros, quotiens maculosae pocula murrae = file n. 488
2 inspicit aut pueros nobiliusve citrum,
3 et gemitus imo ducit de pectore quod non
4 tota miser coemat Saepta feratque domum.
5 quam multi faciunt quod Eros! sed lumine sicco
6 pars maior lacrimas ridet et intus habet.
1. bog, 10. digt. 112 47:17
1 Petit Gemellus nuptias Maronillae = file n. 444
2 et cupit et instat et precatur et donat.
3 adeone pulchra est? immo foedius nil est.
4 quid ergo in illa petitur et placet? tussit.
9. bog, 68. digt. 113 47:36
1 Quid tibi nobiscum est, ludi scelerate magister, = file n. 483
2 invisum pueris virginibusque caput?
3 nondum cristati rupere silentia galli:
4 murmure iam saevo verberibusque tonas.
5 tam grave percussis incudibus aera resultant,
6 causidicum medio cum faber aptat equo:
7 mitior in magno clamor furit amphitheatro,
8 vincenti parmae cum sua turba favet.
9 vicini somnum non tota nocte rogamus:
10 nam vigilare leve est, pervigilare grave est.
11 discipulos dimitte tuos. vis, garrule, quantum
12 accipis ut clames, accipere ut taceas?
14. bog, 134. digt. Fascia pectoralis 114 48:30
1 Fascia, crescentes dominae compesce papillas, = file n. 499
2 ut sit quod capiat nostra tegatque manus.
14. bog, 149. digt. Amictorium 115 48:41
1 Mammosas metuo; tenerae me trade puellae, = file n. 499
2 ut possint niveo pectore lina frui.
1. bog, 100. digt. 116 48:53
1 Mammas atque tatas habet Afra, sed ipsa tatarum = file n. 455
2 dici et mammarum maxima mamma potest.
14. bog, 66. digt. Mamillare 117 49:05
1 Taurino poteras pectus constringere tergo: = file n. 498
2 nam pellis mammas non capit ista tuas.
38-----------------------------------------------------------------INGUINE Bisætninger UNDERLIV
-------------------------------------------------------------------
Marcus Valerius Martialis: Epigrammer.
9. bog, 67. digt. 118 49:20
1 Lascivam tota possedi nocte puellam, = file n. 483
2 cuius nequitias vincere nulla potest.
3 fessus mille modis illud puerile poposci:
4 ante preces totas primaque verba dedit.
5 inprobius quiddam ridensque rubensque rogavi:
6 pollicitast nulla luxuriosa mora.
7 sed mihi pura fuit; tibi non erit, Aeschyle, si vis
8 accipere hoc munus condicione mala.
3. bog, 90. digt. 119 50:00
1 Vult, non vult dare Galla mihi, nec dicere possum, = file n. 461
2 quod vult et non vult, quid sibi Galla velit.
2. bog, 25. digt. 120 50:09
1 Das numquam, semper promittis, Galla, roganti. = file n. 456
2 si semper fallis, iam rogo, Galla, nega.
4. bog, 71. digt. 121 50:22
1 Quaero diu totam, Safroni Rufe, per urbem, = file n. 465
2 si qua puella neget: nulla puella negat.
3 tamquam fas non sit, tamquam sit turpe negare,
4 tamquam non liceat, nulla puella negat.
5 casta igitur nulla est? sunt castae mille. quid ergo
6 casta facit? non dat, non tamen illa negat.
2. bog, 49. digt. 122 50:49
1 Uxorem nolo Telesinam ducere: quare? = file n. 457
2 moecha est. sed pueris dat Telesina. volo.
2. bog, 56. digt. 123 51:02
1 Gentibus in Libycis uxor tua, Galle, male audit = file n. 457
2 inmodicae foedo crimine avaritiae.
3 sed mera narrantur mendacia: non solet illa
4 accipere omnino. quid solet ergo? dare.
7. bog, 75. digt. 124 51:24
1 Vis futui gratis, cum sis deformis anusque. = file n. 476
2 res perridicula est: vis dare nec dare vis.
11. bog, 62. digt. 125 51:36
1 Lesbia se iurat gratis numquam esse fututam. = file n. 491
2 verum est. cum futui vult, numerare solet.
10. bog, 75. digt. 126 51:45
1 Milia viginti quondam me Galla poposcit = file n. 487
2 et, fateor, magno non erat illa nimis.
3 annus abit: "Bis quina dabis sestertia," dixit.
4 poscere plus visa est quam prius illa mihi.
5 iam duo poscenti post sextum milia mensem
6 mille dabam nummos. noluit accipere.
7 transierant binae forsan trinaeve Kalendae,
8 aureolos ultro quattuor ipsa petit.
9 non dedimus. centum iussit me mittere nummos;
10 sed visa est nobis haec quoque summa gravis.
11 sportula nos iunxit quadrantibus arida centum;
12 hanc voluit: puero diximus esse datam.
13 inferius numquid potuit descendere? fecit.
14 dat gratis, ultro dat mihi Galla: nego.
Maskulinum, femininum og neutrum studeres i appendix, side 48 - 62 file n. 604
42-----------------------------------------------------------------CORPORE BELLO Helsætninger SKØN KROP
-------------------------------------------------------------------
Marcus Valerius Martialis: Epigrammer.
10. bog, 65. digt. 127 52:50
1 Cum te municipem Corinthiorum = file n. 487
2 iactes, Charmenion, negante nullo,
3 cur frater tibi dicor, ex Hiberis
4 et Celtis genitus Tagique civis?
5 an vultu similes videmur esse?
6 tu flexa nitidus coma vagaris,
7 Hispanis ego contumax capillis;
8 levis dropace tu cotidiano,
9 hirsutis ego cruribus genisque;
10 os blaesum tibi debilisque lingua est,
11 nobis ilia fortius loquentur:
12 tam dispar aquilae columba non est
13 nec dorcas rigido fugax leoni.
14 quare desine me vocare fratrem,
15 ne te, Charmenion, vocem sororem.
3. bog, 63. digt. 128 53:45
1 Cotile, bellus homo es: dicunt hoc, Cotile, multi. = file n. 460
2 audio; sed quid sit, dic mihi, bellus homo?
3 "Bellus homo est, flexos qui digerit ordine crines,
4 balsama qui semper, cinnama semper olet;
5 cantica qui Nili, qui Gaditana susurrat,
6 qui movet in varios bracchia vulsa modos;
7 inter femineas tota qui luce cathedras
8 desidet atque aliqua semper in aure sonat,
9 qui legit hinc illinc missas scribitque tabellas;
10 pallia vicini qui refugit cubiti;
11 qui scit quam quis amet, qui per convivia currit,
12 Hirpini veteres qui bene novit avos."
13 quid narras? hoc est, hoc est homo, Cotile, bellus?
14 res pertricosa est, Cotile, bellus homo.
4. bog, 42. digt. 129 54:50
1 Si quis forte mihi possit praestare roganti, = file n. 463
2 audi, quem puerum, Flacce, rogare velim.
3 Niliacis primum puer hic nascatur in oris:
4 nequitias tellus scit dare nulla magis.
5 sit nive candidior: namque in Mareotide fusca
6 pulchrior est quanto rarior iste color.
7 lumina sideribus certent mollesque flagellent
8 colla comae: tortas non amo, Flacce, comas.
9 frons brevis atque modus leviter sit naribus uncis,
10 Paestanis rubeant aemula labra rosis.
11 saepe et nolentem cogat nolitque volentem,
12 liberior domino saepe sit ille suo;
13 et timeat pueros, excludat saepe puellas;
14 vir reliquis, uni sit puer ille mihi.
15 "Iam scio, nec fallis: nam me quoque iudice verum est.
16 talis erat" dices "noster Amazonicus."
12. bog, 38. digt. 130 56:00
1 Hunc qui femineis noctesque diesque cathedris = file n. 494
2 incedit tota notus in urbe nimis,
3 crine nitens, niger unguento, perlucidus ostro,
4 ore tener, latus pectore, crure glaber,
5 uxori qui saepe tuae comes inprobus haeret,
6 non est quod timeas, Candide: non futuit.
12. bog, 54. digt. 131 56:37
1 Crine ruber, niger ore, brevis pede, lumine laesus, = file n. 495
2 rem magnam praestas, Zoile, si bonus es.
44-----------------------------------------------------------------CORPORE TURPI Helsætninger GRIM KROP
-------------------------------------------------------------------
Marcus Valerius Martialis: Epigrammer.
6. bog, 39. digt. 132 56:48
1 Pater ex Marulla, Cinna, factus es septem = file n. 470
2 non liberorum: namque nec tuus quisquam
3 nec est amici filiusve vicini,
4 sed in grabatis tegetibusque concepti syv små pus kender
5 materna produnt capitibus suis furta. vi på fædres ansigt
6 hic qui retorto crine Maurus incedit
7 subolem fatetur esse se coci Santrae.
8 at ille sima nare, turgidis labris
9 ipsa est imago Pannychi palaestritae.
10 pistoris esse tertium quis ignorat,
11 quicumque lippum novit et videt Damam?
12 quartus cinaeda fronte, candido vultu
13 ex concubino natus est tibi Lygdo:
14 percide, si vis, filium: nefas non est.
15 hunc vero acuto capite et auribus longis,
16 quae sic moventur ut solent asellorum,
17 quis morionis filium negat Cyrtae?
18 duae sorores, illa nigra et haec rufa,
19 Croti choraulae vilicique sunt Carpi.
20 iam Niobidarum grex tibi foret plenus
21 si spado Coresus Dindymusque non esset.
3. bog, 51. digt. 133 58:09
1 Cum faciem laudo, cum miror crura manusque, = file n. 460
2 dicere, Galla, soles, "Nuda placebo magis,"
3 et semper vitas communia balnea nobis.
4 numquid, Galla, times ne tibi non placeam?
11. bog, 100. digt. 134 58:28
1 Habere amicam nolo, Flacce, subtilem, = file n. 449
2 cuius lacertos anuli mei cingant,
3 quae clune nudo radat et genu pungat,
4 cui serra lumbis, cuspis eminet culo.
5 sed idem amicam nolo mille librarum.
6 carnarius sum, pinguiarius non sum.
3. bog, 53. digt. 135 58:50
1 Et vultu poteram tuo carere = file n. 460
2 et collo manibusque cruribusque
3 et mammis natibusque clunibusque,
4 et, ne singula persequi laborem,
5 tota te poteram, Chloe, carere.
-------------------------------------------------------------------
IN FINE CHARTAE Overgangsrelativ FODNOTE
-------------------------------------------------------------------
3. bog, 68. digt. 136 59:09
1 Huc est usque tibi scriptus, matrona, libellus. = file n. 461
2 cui sint scripta rogas interiora? mihi.
3 gymnasium, thermae, stadium est hac parte: recede.
4 exuimur: nudos parce videre viros.
5 hinc iam deposito post vina rosasque pudore,
6 quid dicat nescit saucia Terpsichore:
7 schemate nec dubio sed aperte nominat illam
8 quam recipit sexto mense superba Venus,
9 custodem medio statuit quam vilicus horto,
10 opposita spectat quam proba virgo manu.
11 si bene te novi, longum iam lassa libellum
12 ponebas, totum nunc studiosa legis. igen, dansk
46----------------------------------------------------------------- file n. 604Anbefales: Martials kropssprog, indhold, omfordeling, versemål
Prossimo fil n. 604 Martial lydbog 2
Marcus Valerius Martialis: Epigrammer (lydbog) I-XLII
[Epigrammata]
Ritorna a INDEX o (Nuova!) HOME PAGE 2O23 LatinaLectio!
LatinaLectio 